Meta-ს მომსახურების პირობები

მომსახურების პირობები

მიმოხილვა

ძალაშია 1 იანვარი, 2025-მდე | საბეჭდი ვერსიის ნახვა

Meta ქმნის ტექნოლოგიებსა და მომსახურებებს, რომლებიც ადამიანებს საშუალებას აძლევს, დაუკავშირდნენ ერთმანეთს, შექმნან საზოგადოებები და განავითარონ ბიზნესი. წინამდებარე მომსახურების პირობები (შემდგომში, „პირობები“) არეგულირებს თქვენ მიერ Facebook-ის, Messenger-ისა და სხვა პროდუქტების, ვებსაიტების, ფუნქციების, აპლიკაციების, მომსახურებების, ტექნოლოგიებისა და იმ პროგრამების გამოყენებასა და მათზე თქვენს წვდომას, რომელსაც გთავაზობთ (Meta-ს პროდუქტები ან პროდუქტები), გარდა იმ შემთხვევებისა, როდესაც ჩვენ ნათლად აღვნიშნავთ, რომ ვრცელდება სხვა (და არა წინამდებარე) პირობები. (მაგალითად, თქვენ მიერ Instagram-ის გამოყენებაზე ვრცელდება Instagram-ის გამოყენების პირობები). ამ პროდუქტებს გაწვდით Meta Platforms, Inc. შესაბამისად, წინამდებარე პირობები წარმოადგენს შეთანხმებას თქვენსა და Meta Platforms, Inc.-ს შორის. იმ შემთხვევაში, თუ არ ეთანხმებით წინამდებარე პირობებს, არ გამოიყენოთ Facebook ან სხვა პროდუქტები და მომსახურებები, რომლებზეც ვრცელდება წინამდებარე პირობები ან არ განახორციელოთ მათზე წვდომა.

ეს პირობები (წინათ ცნობილი, როგორც უფლებებისა და ვალდებულებების შესახებ განცხადება) წარმოადგენს თქვენსა და Meta Platforms, Inc.-ს შორის დადებულ სრულ შეთანხმებას ჩვენი პროდუქტების გამოყენების შესახებ. ის ანაცვლებს ნებისმიერ აქამდე დადებულ შეთანხმებას.

ჩვენ არ გაკისრებთ გადასახადს Facebook-ის ან ამ პირობებით გათვალისწინებული სხვა პროდუქტებისა და მომსახურებების გამოყენებისთვის, თუ სხვაგვარად არ გვაქვს მითითებული. აღნიშნულის ნაცვლად კომპანიები და ორგანიზაციები და სხვა პირები გვიხდიან ჩვენ, რათა გაჩვენოთ რეკლამები მათი პროდუქტებისა და სერვისების შესახებ. ჩვენი პროდუქტების გამოყენებით, თქვენ აცხადებთ თანხმობას, რომ ჩვენ შეგვიძლია განახოთ რეკლამები, რომელიც ჩვენი თვალსაზრისით, შესაძლოა შეგესაბამებოდეთ თქვენ და თქვენს ინტერესებს. ჩვენ ვიყენებთ თქვენს პერსონალურ მონაცემებს იმის დასადგენად, თუ რომელი პერსონალიზებული რეკლამები გაჩვენოთ.

ჩვენ არ ვყიდით თქვენს პერსონალურ მონაცემებს რეკლამის განმთავსებლებს და ჩვენ არ ვუზიარებთ რეკლამირებულ ინფორმაციას, რომელიც პირდაპირ განსაზღვრავს თქვენს ვინაობას (მაგ. თქვენი სახელი, ელექტრონული ფოსტის მისამართი ან სხვა საკონტაქტო ინფორმაცია), თუ არ მოგვცემთ კონკრეტულ ნებართვას. ამის ნაცვლად, რეკლამის განმთავსებლებს შეუძლიათ გვითხრან ისეთი ტიპის აუდიტორიით, რომელთაც სურთ რომ ნახონ თავიანთი რეკლამები და ჩვენ ვაჩვენებთ იმ რეკლამირებას, ვინც შეიძლება დაინტერესდეს. ჩვენ რეკლამის განმთავსებლებს ვაწვდით ანგარიშებს მათი რეკლამირების შესრულების შესახებ, რაც მათ ეხმარება, გაიგონ, როგორი ინტერაქცია აქვთ ადამიანებს მათ შიგთავსთან. იხილეთ სექცია 2 ქვემოთ, რათა გაიგოთ მეტი იმის შესახებ, თუ როგორ მუშაობს ამ პირობების შესაბამისად პერსონალიზებული რეკლამა Meta-ს პროდუქტებზე.

ჩვენი კონფიდენციალურობის დებულება განმარტავს, თუ როგორ ვაგროვებთ და ვიყენებთ თქვენს პერსონალურ მონაცემებს, რომ განვსაზღვროთ ზოგიერთი რეკლამა, რომელსაც ხედავთ და უზრუნველვყოთ ქვემოთ აღწერილი ყველა სხვა მომსახურება. ასევე, შეგიძლიათ, ნებისმიერ დროს შეხვიდეთ Meta-ს შესაბამისი პროდუქტის პარამეტრების გვერდზე, რათა გადახედოთ თქვენს კონფიდენციალურობის პარამეტრებს იმის შესახებ, თუ როგორ ვიყენებთ თქვენს მონაცემებს.

რომელ პროდუქტებზე ვრცელდება წინამდებარე პირობები?

1. ჩვენს მიერ გაწეული მომსახურებები

ჩვენი მისიაა, ადამიანებს მივცეთ შესაძლებლობა, შექმნან საზოგადოებები და დავაახლოვოთ მსოფლიოს სხვადასხვა წერტილში მყოფი ადამიანები. ამ მისიის შესრულების ხელშეწყობის მიზნით, ჩვენ გთავაზობთ ქვემოთ აღწერილ პროდუქტებს და მომსახურებებს:

1.1 უზრუნველვყოფთ თქვენთვის პერსონალიზებულ გამოცდილებას:

თქვენი გამოცდილება Facebook-ზე სხვისას არ ჰგავს: მათ შორის პოსტები, სიუჟეტები, ღონისძიებები, რეკლამები და სხვა შიგთავსი, რომელსაც ხედავთ Facebook-ის ზოლში ან ჩვენს ვიდეო პლატფორმაზე, თქვენ მიერ გამოწერილი Facebook-ის გვერდები და სხვა ფუნქციები, რომლებიც შეიძლება გამოიყენოთ, მაგალითად, Facebook-ის Marketplace-ი და ძიება. მაგალითად, თქვენი გამოცდილების პერსონალიზების მიზნით, ჩვენ ვიყენებთ მონაცემებს თქვენ მიერ დამყარებული კავშირების, არჩევანისა და გამოყენებული პარამეტრების თაობაზე და იმას, თუ რას აზიარებთ და აკეთებთ ჩვენს პროდუქტებსა და მათ მიღმა.

1.2 გაკავშირებთ ადამიანებთან და ორგანიზაციებთან, რომლებიც გაინტერესებთ:

გეხმარებით, იპოვოთ და დაუკავშირდეთ ისეთ ადამიანებს, ჯგუფებს, კომპანიებს, ორგანიზაციებსა და სხვებს, რომლებიც თქვენთვის მნიშვნელოვანია, თქვენ მიერ გამოყენებული Meta-ს პროდუქტების ფარგლებში. თქვენთვის და სხვებისთვის შეთავაზებების გასაკეთებლად, ჩვენ ვიყენებთ მონაცემებს — მაგალითად, Facebook ჯგუფებში გაწევრიანებისთვის, ღონისძიებებზე დასასწრებად, გვერდების გამოწერისთვის ან მათთან შეტყობინებების გასაგზავნად, სანახაობების საჩვენებლად და ასევე, იმ ადამიანებისა, ვისთანაც შეიძლება გსურდეთ მეგობრობა. უფრო მჭიდრო კავშირები ქმნის უკეთეს საზოგადოებებს და ჩვენ გვჯერა, რომ ჩვენი მომსახურებები ყველაზე სასარგებლოა, როდესაც ადამიანები დაკავშირებულნი არიან ერთმანეთთან, ჯგუფებთან და მათთვის საინტერესო ორგანიზაციებთან.

1.3 გაძლევთ შესაძლებლობას, გამოხატოთ საკუთარი აზრი და ისაუბროთ იმაზე, რაც თქვენთვის მნიშვნელოვანია:

Facebook-ზე გამოხატვისთვის და მეგობრებთან, ოჯახის წევრებთან და სხვებთან კომუნიკაციისთვის თქვენთვის მნიშვნელოვანი თემების შესახებ მრავალი გზა არსებობს — მაგალითად, სტატუსის განახლება, ფოტოების, ვიდეოებისა და სიუჟეტების გაზიარება Meta-ს პროდუქტებზე (თქვენი პარამეტრების შესაბამისად), მეგობართან ან რამდენიმე ადამიანთან შეტყობინებების გაგზავნა ან ხმოვანი/ვიდეო ზარების განხორციელება, ღონისძიებების ან ჯგუფების შექმნა, ან თქვენს პროფილზე შიგთავსის დამატება, ასევე იმის ნახვა, თუ როგორ ურთიერთქმედებენ სხვები თქვენს შიგთავსთან. ჩვენ ასევე შევიმუშავეთ და ჯერ კიდევ ვსწავლობთ ადამიანების მიერ ტექნოლოგიების გამოყენების ახალ გზებს, როგორიცაა დამატებითი რეალობა (AR) და 360-იანი ვიდეო, რათა Meta-ს პროდუქტებზე შევქმნათ და გავაზიაროთ უფრო ექსპრესიული და მიმზიდველი შიგთავსი.

1.4 გეხმარებით, აღმოაჩინოთ თქვენთვის საინტერესო შიგთავსი, პროდუქტები და მომსახურებები:

ჩვენ გაჩვენებთ პერსონალიზებულ რეკლამებს, შეთავაზებებსა და სხვა სახის დაფინანსებულ ან კომერციულ შიგთავსს, რათა დაგეხმაროთ იმ შიგთავსის, პროდუქტებისა და სერვისების აღმოჩენაში, რომელსაც გთავაზობთ სხვადასხვა კომპანია და ორგანიზაცია, რომლებიც იყენებენ Facebook-ის და Meta-ს სხვა პროდუქტებს. ქვემოთ მოცემული მე-2 პუნქტი აღნიშნულს უფრო ვრცლად განმარტავს.

1.5 ჩვენი სერვისების უსაფრთხოების, დაცულობის და მთლიანობის ხელშეწყობა, მავნე მოქმედებების წინააღმდეგ ბრძოლა და ჩვენი მომხმარებელთა საზოგადოების უსაფრთხოების დაცვა:

ადამიანები Meta-ს პროდუქტებზე საზოგადოებას მხოლოდ იმ შემთხვევაში შექმნიან, თუ თავს უსაფრთხოდ და დაცულად იგრძნობენ. ჩვენ ბევრს ვმუშაობთ, რათა შევინარჩუნოთ ჩვენი პროდუქტებისა და სერვისების უსაფრთხოება (ხელმისაწვდომობის, ავთენტურობის, სამართლიანობის და კონფიდენციალურობის ჩათვლით). ჩვენ ვასაქმებთ თავდადებულ გუნდებს მთელს მსოფლიოში, ვმუშაობთ სერვისების გარე მომწოდებლებთან, პარტნიორებთან და სხვა შესაბამის დაწესებულებებთან და ვქმნით მოწინავე ტექნიკურ სისტემებს ჩვენი პროდუქტების პოტენციურად ბოროტად გამოყენების, სხვების მიმართ მავნე ქცევისა და ისეთი სიტუაციების დასადგენად, რომლებშიც ჩვენი საზოგადოების მხარდაჭერა ან დაცვა შეგვიძლია, უფლებების პოტენციურად დამრღვევი შიგთავსის შესახებ მომხმარებლების საჩივრებზე რეაგირების ჩათვლით. თუ შევიტყობთ მსგავსი შიგთავსის ან ქცევის შესახებ, შეგვიძლია ჩვენი შეფასების საფუძველზე მივიღოთ შესაბამისი ზომები, რომლებიც შეიძლება მოიცავდეს — თქვენთვის შეტყობინებას, დახმარების შემოთავაზებას, შიგთავსის წაშლას, გარკვეულ ფუნქციებზე წვდომის შეზღუდვას ან გამორთვას, ანგარიშის გამორთვას ან სამართალდამცავ ორგანოებთან დაკავშირებას. ჩვენ ვაწარმოებთ მონაცემების მიმოცვლას Meta-ს კომპანიებს შორის, როდესაც მომხმარებლის მიერ ჩვენი რომელიმე პროდუქტის ბოროტად გამოყენების ან მავნე ქცევის შემთხვევებს ვაფიქსირებთ, ან რათა უზრუნველვყოთ Meta-ს პროდუქტების, მომხმარებლებისა და საზოგადოების უსაფრთხოება. მაგალითად, ჩვენ ვუზიარებთ ინფორმაციას Meta-ს კომპანიებს, რომლებიც გვაწვდიან ფინანსურ პროდუქტებსა და სერვისებს, რათა დავეხმაროთ მათ უსაფრთხოების, დაცულობისა და სამართლიანობის უზრუნველყოფაში და მოქმედი კანონმდებლობის დაცვაში. Meta-ს შეუძლია მიიღოს წვდომა, შეინახოს, გამოიყენოს და გააზიაროს ნებისმიერი ინფორმაცია, რომელსაც აგროვებს თქვენ შესახებ, სადაც ის საფუძვლიანად თვლის, რომ ამის გაკეთება კანონით არის მოთხოვნილი ან ნებადართული. დამატებითი ინფორმაციისთვის გთხოვთ, გაეცნოთ ჩვენს კონფიდენციალურობის დებულებას.

ზოგიერთ შემთხვევაში, საზედამხედველო საბჭომ შეიძლება შეამოწმოს ჩვენი გადაწყვეტილებები, მისი პირობებისა და რეგლამენტის შესაბამისად. შეიტყვეთ მეტი აქ.

1.6 მოწინავე ტექნოლოგიების გამოყენება და შემუშავება ფუნქციონალური და უსაფრთხო მომსახურების ყველასთვის უზრუნველსაყოფად:

ჩვენ ვიყენებთ და ვავითარებთ მოწინავე ტექნოლოგიებს, როგორიცაა ხელოვნური ინტელექტი, მანქანური სწავლების სისტემები და გაფართოებული რეალობა, რომ ხალხს შეეძლოს ტექნოლოგიების გამოყენება უსაფრთხოდ, მიუხედავად მათი ფიზიკური შესაძლებლობებისა და გეოგრაფიული ადგილმდებარეობისა. მაგალითად, ასეთი ტექნოლოგია ეხმარება დაქვეითებული მხედველობის მქონე პირებს გაიგონ, თუ ვინ არის ფოტოებზე ან ვიდეოებზე, რომელიც გაზიარებულია Facebook-ზე ან Instagram-ზე. ჩვენ ასევე ვქმნით დახვეწილ ქსელურ და საკომუნიკაციო ტექნოლოგიებს, რათა უფრო მეტ ადამიანს დავეხმაროთ დაუკავშირდნენ ინტერნეტს წვდომის შეზღუდულ ადგილებში. ჩვენ ავტომატიზებულ სისტემებს ვავითარებთ, რათა გავაუმჯობესოთ შეურაცხმყოფელი და საშიში ქმედებების აღმოჩენის შესაძლებლობა, რამაც ზიანი შეიძლება მიაყენოს ჩვენს საზოგადოებასა და ჩვენი პროდუქციის მთლიანობას.

1.7 კვლევის გზები ჩვენი მომსახურების გასაუმჯობესებლად:

ჩვენ ვატარებთ კვლევას ჩვენი პროდუქტების შემუშავების, ტესტირებისა და გასაუმჯობესებლად. ეს მოიცავს ჩვენი მომხმარებლების შესახებ არსებული მონაცემების ანალიზს და იმის გაგებას, თუ როგორ იყენებენ ადამიანები ჩვენს პროდუქტებს, მაგალითად, გამოკითხვების ჩატარებით, ტესტირებით და ახალი მახასიათებლების გამართვით. ჩვენი კონფიდენციალურობის დებულება განმარტავს, თუ როგორ ვიყენებთ მონაცემებს ამ კვლევის მხარდასაჭერად, რათა განვავითაროთ და გავაუმჯობესოთ ჩვენი სერვისები.

1.8 თანმიმდევრული და დახვეწილი გამოცდილებების უზრუნველყოფა Meta კომპანიის პროდუქტების ფარგლებში

ჩვენი პროდუქტები დაგეხმარებათ იპოვოთ და დაუკავშირდეთ თქვენთვის მნიშვნელოვან ადამიანებს, ჯგუფებს, ბიზნესებს, ორგანიზაციებსა და სხვებს. ჩვენ ვქმნით ჩვენს სისტემებს ისე, რომ თქვენი გამოცდილება თანმიმდევრული და დახვეწილი იყოს თქვენ მიერ გამოყენებულ სხვადასხვა Meta-ს კომპანიის პროდუქტებში. მაგალითად, ჩვენ ვიყენებთ მონაცემებს იმ ადამიანების შესახებ, ვისთანაც თქვენ ურთიერთობა გაქვთ Facebook-ზე, რათა გაგიმარტივოთ მათთან დაკავშირება Instagram-ზე ან Messenger-ში და საშუალებას გაძლევთ, დაუკავშირდეთ Messenger-ის მეშვეობით იმ კომპანიას, რომელიც გამოწერილი გაქვთ Facebook-ზე.

1.9 ჩვენს სერვისებზე წვდომის უზრუნველყოფა:

ჩვენი გლობალური სერვისების ფუნქციონირებისთვის და ადამიანებთან დასაკავშირებლად მთელ მსოფლიოში, ჩვენ გვჭირდება შიგთავსისა და მონაცემების გადაცემა, შენახვა და გაზიარება ჩვენს მონაცემთა დამუშავების ცენტრების, პარტნიორების, სერვისის პროვაიდერების, მომწოდებლებსა და სისტემებისთვის მთელ მსოფლიოში, მათ შორის თქვენი საცხოვრებელი ქვეყნის ფარგლებს გარეთ. ამ გლობალური ინფრასტრუქტურის გამოყენება აუცილებელია და მნიშვნელოვანია ჩვენი სერვისების უზრუნველსაყოფად. აღნიშნული ინფრასტრუქტურა შეიძლება ეკუთვნოდეს იმართებოდეს ან კონტროლდებოდეს Meta Platforms, Inc.-ის, Meta Platforms Ireland Limited-ის ან მათთან აფილირებული კომპანიების მიერ.

2. როგორ ფინანსდება ჩვენი მომსახურებები

Facebook-ის და ჩვენ მიერ სხვა შემოთავაზებული პროდუქტებისა და მომსახურების გამოყენებისთვის გადახდის ნაცვლად, წინამდებარე პირობებით გათვალისწინებული Meta-ს პროდუქტების გამოყენებით, თქვენ ეთანხმებით, რომ ჩვენ შეგვიძლია გაჩვენოთ პერსონალიზებული რეკლამები და სხვა კომერციული და დაფინანსებული შიგთავსი რომლის Meta-ს კომპანიის პროდუქტებზე და მას გარეთ, გავრცელებისთვის კომპანიები და ორგანიზაციები გვიხდიან. ჩვენ ვიყენებთ თქვენს პერსონალურ მონაცემებს, მაგალითად ინფორმაციას თქვენი საქმიანობისა და ინტერესების შესახებ, რათა გაჩვენოთ პერსონალიზებული რეკლამები და დაფინანსებული შიგთავსი, რომელიც შესაძლოა თქვენთვის აქტუალური იყოს.

ადამიანების პირადი ცხოვრების ხელშეუხებლობის დაცვას აქვს გადამწყვეტი მნიშვნელობა ჩვენი პერსონალიზებული რეკლამების სისტემისთვის. ეს ნიშნავს, რომ ჩვენ შეგვიძლია გაჩვენოთ აქტუალური და სასარგებლო რეკლამები, რეკლამის განმათავსებლებისთვის თქვენი ვინაობის გამხელის გარეშე. ჩვენ არ ვყიდით თქვენს პერსონალურ მონაცემებს. ჩვენ რეკლამის განმათავსებლებს საშუალებას ვაძლევთ გვითხრან, თუ რა არის მათი ბიზნესის მიზანი და რომელ აუდიტორიას სურთ უჩვენონ თავიანთი რეკლამები (მაგალითად, 18-35 წლის ასაკის ადამიანებს, რომლებსაც მოსწონთ ველოსიპედით სეირნობა). შემდეგ ჩვენ ვუჩვენებთ მათ რეკლამას იმ ადამიანებს, რომლებიც ჩვენი აზრით შეიძლება დაინტერესდნენ.

ჩვენ ასევე ვაწვდით რეკლამის განმათავსებლებს ინფორმაციას მათი რეკლამირების მუშაობის ეფექტურობის შესახებ, რათა დავეხმაროთ მათ გააცნობიერონ, თუ როგორ ურთიერთქმედებენ ადამიანები მათ შიგთავსთან Meta-ს პროდუქტებზე და მის მიღმა. მაგალითად, ჩვენ რეკლამის განმთავსებლებს ვაწვდით ზოგად ინფორმაციას დემოგრაფიისა და ინტერესების თაობაზე, რათა დავეხმაროთ მათი აუდიტორიის უკეთ გაცნობაში, მაგალითად ისეთი ფაქტის, რომ 25-დან 34 წლამდე ასაკის ქალებმა, რომლებიც ცხოვრობენ მადრიდში და მოსწონთ პროგრამული უზრუნველყოფის ინჟინერია, ნახეს ეს რეკლამა. ჩვენ არ ვაზიარებთ ინფორმაციას, რომელიც პირდაპირ ახდენს თქვენს იდენტიფიცირებას (ინფორმაციას, როგორიცაა თქვენი სახელი ან ელექტრონული ფოსტის მისამართი, რომელიც თავისთავად შესაძლოა გამოყენებულ იქნას თქვენთან დასაკავშირებლად ან თქვენი ვინაობის დასადგენად), თუ არ მოგვცემთ ამისთვის სპეციალურ ნებართვას. შეიტყვეთ მეტი Meta-ს რეკლამების მუშაობის შესახებ აქ.

ჩვენ ვაგროვებთ და ვიყენებთ თქვენს პერსონალურ მონაცემებს, რათა ზემოთ აღწერილი სერვისები მოგაწოდოთ. იმას, თუ როგორ ვაგროვებთ და ვიყენებთ თქვენს მონაცემებს, შეგიძლიათ გაეცნოთ ჩვენს კონფიდენციალურობის დებულებაში. თქვენ გაქვთ კონტროლი რეკლამების ტიპებსა და რეკლამების განმათავსებლებზე, რომლებსაც ხედავთ, და ინფორმაციის ტიპებზე, რომლებსაც ვიყენებთ, რომ განვსაზღვროთ, რომელ რეკლამებს გიჩვენებთ. გაიგეთ მეტი.

3. თქვენი წვლილით Facebook-სა და ჩვენს საზოგადოებაში

ჩვენ უზრუნველვყოფთ ამ მომსახურებებს თქვენთვის და სხვებისთვის, რათა ჩვენი მისია და მომსახურება გავაუმჯობესოთ. სანაცვლოდ, თქვენ უნდა იკისროთ შემდეგი ვალდებულებები:

3.1 ვის შეუძლია Facebook-ის გამოყენება

მაშინ, როდესაც ადამიანები საკუთარ მოსაზრებებსა და ქმედებებზე პასუხისმგებლობას იღებენ, ჩვენი საზოგადოება უფრო უსაფრთხო და ანგარიშვალდებულია. ამისთვის, თქვენ უნდა:

მიუთითოთ ანგარიშში იგივე სახელი, რასაც იყენებთ ყოველდღიურ ცხოვრებაში.
მოგვაწოდოთ ზუსტი ინფორმაცია თქვენს შესახებ.
შექმნათ მხოლოდ ერთი ანგარიში (საკუთარი) და გამოიყენოთ ის პირადი მიზნებისთვის.
არ გაუზიაროთ თქვენი პაროლი, მისცეთ თქვენს Facebook ანგარიშზე წვდომის უფლება სხვებს, ან გადასცეთ თქვენი ანგარიში სხვას (ჩვენი ნებართვის გარეშე).

ჩვენ ვცდილობთ, Facebook ხელმისაწვდომი გავხადოთ ყველასთვის, მაგრამ თქვენ ვერ გამოიყენებთ Facebook-ს, თუ:

თქვენ ხართ 13 წელს ქვემოთ.
ნასამართლევი ხართ სექსუალური ხასიათის დანაშაულებისთვის.
ჩვენი პირობების, საზოგადოების სტანდარტებისა თუ სხვა პირობებისა და წესების დარღვევის გამო გავთიშეთ თქვენი ანგარიში, რაც, ასევე, ვრცელდება თქვენ მიერ Facebook-ის გამოყენებაზე. თქვენ აცხადებთ თანხმობას, რომ იმ შემთხვევაში, თუ ჩვენი პირობების, საზოგადოების სტანდარტებისა თუ სხვა პირობებისა და წესების დარღვევის გამო გავთიშავთ თქვენს ანგარიშს, ჩვენი ნებართვის გარეშე არ შექმნით სხვა ანგარიშს. ახალი ანგარიშის შექმნის ნებართვის მიღება ხდება ჩვენი შეხედულებისამებრ და არ ნიშნავს ან არ გულისხმობს იმას, რომ დისციპლინური პასუხისმგებლობა იყო არასწორი ან უსაფუძვლო.
თქვენ აკრძალული გაქვთ ჩვენი პროდუქტების, მომსახურების ან პროგრამული უზრუნველყოფის მიღება მოქმედი კანონმდებლობის შესაბამისად.

3.2 რის გაზიარებასა და განხორციელებას შეძლებთ Meta-ს პროდუქტებზე

ჩვენ გვსურს, რომ ადამიანებმა გამოიყენონ Meta-ს პროდუქტები საკუთარი თავის გამოსახატად და გააზიარონ მათთვის მნიშვნელოვანი შიგთავსი, მაგრამ არა სხვების უსაფრთხოებისა და კეთილდღეობის ან ჩვენი საზოგადოების მთლიანობისთვის საფრთხის შექმნის ხარჯზე. შესაბამისად, თქვენ ეთანხმებით, რომ არ ჩაერთვებით ქვემოთ აღწერილ ქმედებებში (ან არ შეუწყობთ სხვებს ხელს და უბიძგებთ ამისკენ):

თქვენ არ შეგიძლიათ გამოიყენოთ ჩვენი პროდუქტები, რომ მოიმოქმედოთ ან გააზიაროთ ნებისმიერი რამ:
- რაც არღვევს წინამდებარე პირობებს, საზოგადოების სტანდარტებს ან სხვა პირობებსა და დებულებებს, რომლებიც ეხება თქვენ მიერ ჩვენი პროდუქტების გამოყენებას.
- რაც არის უკანონო, შეცდომაში შემყვანი, დისკრიმინაციული ან თაღლითური (ან ეხმარება ვინმეს ჩვენი პროდუქტების ამგვარად გამოყენებაში).
- რაც თქვენ არ გეკუთვნით ან არ გაქვთ მისი გაზიარებისთვის საჭირო უფლებები.
- რაც ზღუდავს ან არღვევს სხვის უფლებებს, მათ შორის ინტელექტუალური საკუთრების უფლებებს (მაგალითად, სხვისი საავტორო უფლებების ან სასაქონლო ნიშნის უფლებების დარღვევით, ან ყალბი ან კონტრაფაქციული საქონლის გავრცელების ან გაყიდვის გზით), გარდა შემთხვევებისა, როცა მოქმედი კანონმდებლობით გამონაკლისი ან შეზღუდვა მოქმედებს.
თქვენ არ გაქვთ უფლება, ატვირთოთ ვირუსები ან მავნე კოდი, გამოიყენოთ მომსახურებები სპამის გასაგზავნად, ან მოიმოქმედოთ სხვა რამ, რამაც შეიძლება გათიშოს, გადატვირთოს, ხელი შეუშალოს, ან შეაფერხოს ჩვენი მომსახურებების, სისტემების, ან პროდუქტების გამართული მუშაობა, მთლიანობა, ფუნქციონირება, ან გამოსახულება.
თქვენ არ გაქვთ უფლება (ჩვენი წინასწარი ნებართვის გარეშე), მიიღოთ წვდომა ან შეაგროვოთ მონაცემები ჩვენი პროდუქტებიდან ავტომატიზებული საშუალებების გამოყენებით ან ეცადოთ იმ მონაცემებზე წვდომის მიღებას, რომლებზეც წვდომის უფლებაც არ გაქვთ, მიუხედავად იმისა, ასეთი ავტომატური წვდომა ან შეგროვება განხორციელებული იყო თუ არა Facebook-ის ანგარიშში შესვლისას.
თქვენ არ გაქვთ უფლება, გადასცეთ, მოითხოვოთ, ან შეაგროვოთ პროდუქტის მომხმარებლების სახელები ან პაროლები, ან მიითვისოთ წვდომის მარკერები.
გარდა იმ შემთხვევისა, თუ ეს განსაზღვრულიაპლატფორმის პირობებში, თქვენ არ შეგიძლიათ, გაყიდოთ, მოიპოვოთ ლიცენზია, ან შეიძინოთ ჩვენგან ან ჩვენი მომსახურებებიდან მიღებული ნებისმიერი მონაცემი, მიუხედავად იმისა, მოპოვებული იყო თუ არა ეს მონაცემები Facebook-ის ანგარიშში შესვლისას.
თქვენ არ გაქვთ უფლება, ბოროტად გამოიყენოთ ნებისმიერი შეტყობინების, მონიშვნის, დავების, ან გასაჩივრების არხები, თაღლითური, განმეორებადი, ან უსაფუძვლო საჩივრების ან აპელაციების შექმნის გზით.
თქვენ არ გაქვთ უფლება, შეასრულოთ ისეთი მოქმედება, ან მოქმედების მცდელობა, რომელიც გვერდს აუვლის ჩვენს ტექნოლოგიურ საზომებს, რომელთა მეშვეობითაც Meta ახორციელებს ჩვენი პროდუქტების ან მონაცემების კონტროლს ან მათზე წვდომის შეზღუდვას.

ჩვენ შეგვიძლია შევწყვიტოთ ან შევზღუდოთ წვდომა შიგთავსზე, რომელიც არღვევს წინამდებარე დებულებებს. 4.2. განყოფილებაში მითითებული წესით, ჩვენ, ასევე, უფლებამოსილი ვართ, შევაჩეროთ ან გავთიშოთ თქვენი ანგარიში, თუ ადგილი ექნება ქცევას, რომელიც არღვევს წინამდებარე დებულებებს.

იმ შემთხვევაში, თუ წავშლით თქვენ მიერ საზოგადოების სტანდარტების დარღვევით გაზიარებულ შიგთავსს, ჩვენ შეგატყობინებთ და აგიხსნით იმ შესაძლებლობებს, რომელიც გაქვთ, რათა მოითხოვოთ ხელახალი გადახედვა, გარდა იმ შემთხვევისა, თუ: თქვენ უხეშად ან განმეორებით არღვევთ ამ პირობებს ან ამით ჩვენ ან სხვები აღმოჩნდებიან სამართლებრივი პასუხისმგებლობის წინაშე; ზიანი მიადგება მომხმარებელთა ჩვენს საზოგადოებას; ხელი შეეშლება ჩვენი რომელიმე სერვისის, სისტემის ან პროდუქტის მთლიანობას ან მუშაობას; ტექნიკური შეზღუდვების გამო ვერ გაწვდით ასეთ ინფორმაციას; ან ამას სამართლებრივი მიზეზები გვიკრძალავს. ანგარიშის მოქმედების შეჩერების ან შეწყვეტის შესახებ ინფორმაციისათვის, იხილეთ ქვემოთ მოცემული 4.2 განყოფილება.

დეზინფორმაციასთან ბრძოლისათვის ვთანამშრომლობთ ფაქტების შემმოწმებელ დამოუკიდებელ სპეციალისტებთან ბევრ სხვადასხვა იურისდიქციაში. ფაქტების შემმოწმებლების მიერ შიგთავსის შეფასების შემდეგ, დამატებითი კონტექსტის უზრუნველსაყოფად შესაძლოა, მას დავურთოთ შეტყობინება. დამატებითი ინფორმაცია ფაქტების შემმოწმებლების შესახებ შეგიძლიათ იხილოთ აქ.

ჩვენი საზოგადოების მხარდაჭერის მიზნით, გირჩევთ, გაასაჩივროთ ისეთი შიგთავსი ან მოქმედება, რომელიც, თქვენი აზრით, არღვევს თქვენს უფლებებს (მათ შორის, ინტელექტუალური საკუთრების უფლებებს) ან ჩვენს პირობებსა ან დებულებებს, თუ ეს ფუნქცია არსებობს თქვენს იურისდიქციაში. ასევე, შეგვიძლია წავშალოთ ან შევზღუდოთ შიგთავსზე, ფუნქციებზე, მომსახურებებსა ან ინფორმაციაზე წვდომა, თუ დავადგენთ, რომ ამის გაკეთება გონივრულად აუცილებელია Meta-ზე უარყოფითი სამართლებრივი ან რეგულაციური ზემოქმედებისა ან ჩვენი მომსახურების ბოროტად გამოყენების თავიდან ასაცილებლად თუ შესამსუბუქებლად.

3.3 ნებართვები, რომლებსაც გვაძლევთ

თქვენთვის მომსახურების გასაწევად გვჭირდება გარკვეული ნებართვები:

1. თქვენი შიგთავსი: ზოგიერთი შიგთავსი, რომელსაც აზიარებთ ან ტვირთავთ, როგორიცაა ფოტოები ან ვიდეოები, დაცული შეიძლება იყოს ინტელექტუალური საკუთრების კანონმდებლობით.

თქვენ ინარჩუნებთ ინტელექტუალური საკუთრების უფლებებს (როგორიცაა საავტორო უფლებები ან სასაქონლო ნიშნები) ნებისმიერ ისეთ შიგთავსზე, რომელსაც ქმნით და აზიარებთ Facebook-ზე და თქვენ მიერ გამოყენებულ სხვა Meta კომპანიის პროდუქტებზე. წინამდებარე პირობებში არაფერია ისეთი, რაც წაგართმევთ თქვენს შიგთავსზე უფლებებს. თქვენ თავისუფლად შეგიძლიათ გაუზიაროთ თქვენი შიგთავსი, ვისაც გსურთ და სადაც გსურთ.

თუმცა, ჩვენი სერვისების უზრუნველსაყოფად საჭიროა, რომ მოგვცეთ გარკვეული სამართლებრივი ნებართვები (ანუ „ლიცენზია“) ამ შიგთავსის გამოსაყენებლად. აღნიშნული საჭიროა მხოლოდ პროდუქტებისა და მომსახურების მიწოდებისა და გაუმჯობესების მიზნებისათვის, როგორც ეს აღწერილია ზემოთ, 1-ელ ნაწილში.

2. თქვენ მიერ შექმნილი და გაზიარებული შიგთავსის გამოყენების ნებართვა: კერძოდ, როდესაც ჩვენს პროდუქტებზე ან მათთან კავშირში აზიარებთ, აქვეყნებთ, ან ტვირთავთ შიგთავსს, რომელზეც ვრცელდება ინტელექტუალური საკუთრების უფლებები, თქვენ გვაძლევთ არაექსკლუზიურ, გადაცემად, ქველიცენზირებად, უსასყიდლო და მსოფლიო მასშტაბის ლიცენზიას თქვენი შიგთავსის მასპინძლობის, გამოყენების, განაწილების, შეცვლის, გაშვების, კოპირების, საჯაროდ შესრულების ან ჩვენების, თარგმნისა და ნაწარმოები ნამუშევრების შექმნის მიზნით (თქვენი კონფიდენციალურობისა და გამოყენების პარამეტრების შესაბამისად). ეს ნიშნავს, რომ მაგალითად, თუ ფოტოს აზიარებთ Facebook-ზე, გვაძლევთ მისი შენახვის, კოპირებისა და სხვებისთვის გაზიარების უფლებას (ისევ თქვენი პარამეტრების შესაბამისად), როგორიცაა Meta-ს პროდუქტები და მომსახურების მომწოდებლები, რომლებიც მხარს უჭერენ ასეთ პროდუქტებსა და მომსახურებას. ამ ლიცენზიის მოქმედება დასრულდება, როდესაც თქვენი შიგთავსი წაიშლება ჩვენი სისტემებიდან.

3. თქვენი შიგთავსის წაშლა: თქვენ ნებისმიერ დროს შეგიძლიათ წაშალოთ ინდივიდუალური შიგთავსი, რომელსაც აზიარებთ, განათავსებთ და ატვირთავთ. გარდა ამისა, თქვენს პირად ანგარიშზე განთავსებული ნებისმიერი შიგთავსი მთლიანად წაიშლება, თუ თქვენს ანგარიშს წაშლით. შეიტყვეთ მეტი თქვენი ანგარიშის წაშლის შესახებ. ანგარიშის წაშლა ავტომატურად არ წაშლის შიგთავსს, რომელსაც თქვენ აქვეყნებთ გვერდის ადმინისტრატორის სახით, ან შიგთავსს, რომელსაც ქმნით სხვა მომხმარებლებთან ერთად, მაგალითად ფოტოებს გაზიარებულ ალბომებში, რომლებიც შეიძლება კვლავ იყოს ხილული ალბომის სხვა მომხმარებლებისთვის.

შიგთავსის წაშლას ანგარიშის წაშლის პროცესის დაწყებიდან ან შიგთავსის წაშლის მოთხოვნის მიღებიდან შეიძლება 90 დღემდე დრო დასჭირდეს. თუ შიგთავსს ნაგავში აგზავნით, წაშლის პროცესი ავტომატურად დაიწყება 30 დღეში, თუ უფრო ადრე არ გადაწყვეტთ შიგთავსის წაშლას. სანამ მიმდინარეობს ასეთი შიგთავსის წაშლის პროცესი, შიგთავსი აღარ არის ხილული სხვა მომხმარებლებისთვის. შიგთავსის წაშლის შემდეგ შეიძლება დაგვჭირდეს კიდევ 90 დღე მის სარეზერვო ასლებისა და ავარიული აღდგენის სისტემებიდან ამოსაშლელად.

შიგთავსი არ წაიშლება ანგარიშის წაშლიდან ან შიგთავსის წაშლის პროცესის დაწყებიდან 90 დღის განმავლობაში, შემდეგ სიტუაციებში:

თუ თქვენი შიგთავსი სხვებმა გამოიყენეს ამ ლიცენზიის შესაბამისად და მათ არ წაუშლიათ ის (ამ შემთხვევაში მოცემული ლიცენზიის მოქმედება გაგრძელდება ამ შიგთავსის წაშლამდე);
თუ 90 დღის განმავლობაში წაშლა შეუძლებელია ჩვენი სისტემების ტექნიკური შეზღუდვების გამო, ამ შემთხვევაში, ჩვენ დავასრულებთ წაშლას, როგორც კი ეს ტექნიკურად იქნება შესაძლებელი; ან
თუ დაუყოვნებლივი წაშლა შეზღუდავს ჩვენს შესაძლებლობებს:
- გამოვიძიოთ ან გამოვავლინოთ უკანონო საქმიანობა ან ჩვენი პირობებისა ან დებულებების დარღვევები (მაგალითად, ჩვენი პროდუქტების ან სისტემების ბოროტად გამოყენების გამოვლენა ან გამოძიება);
- დავიცვათ ჩვენი პროდუქტების, სისტემების, სერვისების, თანამშრომლებისა და მომხმარებლების უსაფრთხოება, მთლიანობა და დაცულობა და ასევე დავიცვათ საკუთარი თავი;
- შევასრულოთ სამართლებრივი ვალდებულებები მტკიცებულებების შესანარჩუნებლად, მათ შორის Meta-ს კომპანიების მონაცემების, რომლებიც გვაწოდებს ფინანსურ პროდუქტებსა და მომსახურებას კანონით მოთხოვნილი აღრიცხვის წარმოების ნებისმიერი ვალდებულებების შესასრულებლად; ან
- დავემორჩილოთ სასამართლო ან ადმინისტრაციული ორგანოს, სამართალდამცავი ორგანოების ან სამთავრობო უწყების მოთხოვნებს;

ამ შემთხვევაში, შიგთავსი შენარჩუნდება არა უმეტეს იმ ვადისა, ვიდრე ეს აუცილებელია იმ მიზნებისათვის, რისთვისაც მოხდა შენახვაც (ზუსტი ხანგრძლივობა განსხვავდება შემთხვევების მიხედვით).

თითოეულ ზემოთ ჩამოთვლილ შემთხვევაში, ამ ლიცენზიის მოქმედება გაგრძელდება შიგთავსის სრულ წაშლამდე.

4. თქვენი ვინაობის, პროფილის სურათისა და თქვენი მოქმედებების შესახებ ინფორმაციის გამოყენების ნებართვა რეკლამებსა და დაფინანსებულ ან კომერციულ შიგთავსთან: თქვენ უფლებას გვაძლევთ, გამოვიყენოთ თქვენი სახელი და პროფილის სურათი და ინფორმაცია Facebook-ზე იმ რეკლამებთან, შეთავაზებებსა და სხვა დაფინანსებულ ან კომერციულ შიგთავსთან დაკავშირებით თქვენ მიერ განხორციელებული მოქმედებების შესახებ, რომელსაც ჩვენ ვაჩვენებთ ჩვენს პროდუქტებში, თქვენთვის რაიმე ანაზღაურების გარეშე. მაგალითად, ჩვენ შეიძლება ვაჩვენოთ თქვენს მეგობრებს, რომ თქვენ დაინტერესებული ხართ რეკლამირებული ღონისძიებით ან მოიწონეთ ბრენდის მიერ შექმნილი Facebook-ის გვერდი, რომელმაც გადაგვიხადა Facebook-ზე თავისი რეკლამების ჩვენებისთვის. მსგავსი რეკლამების და შიგთავსის ნახვა მხოლოდ იმ ადამიანებს შეუძლიათ, ვისაც აქვს თქვენი ნებართვა, ნახოს თქვენ მიერ Meta-ს პროდუქტებზე განხორციელებული მოქმედებები. შეგიძლიათ შეიტყოთ მეტი თქვენი რეკლამის პარამეტრებისა და პრეფერენციების შესახებ.

5. თქვენ მიერ გამოყენებული პროგრამული უზრუნველყოფის განახლების ან ჩამოტვირთვის ნებართვა: თუ თქვენ ჩამოტვირთავთ ან იყენებთ ჩვენს პროგრამულ უზრუნველყოფას, ეს ნიშნავს, რომ უფლებას გვაძლევთ ჩამოვტვირთოთ და დავაინსტალიროთ განახლებები პროგრამულ უზრუნველყოფაში (შესაძლებლობის შემთხვევაში).

3.4 ჩვენი ინტელექტუალური საკუთრების გამოყენების შეზღუდვები

თუ იყენებთ ინტელექტუალური საკუთრების უფლებებით დაცულ შიგთავსს, რომელიც ჩვენ გვაქვს და ჩვენს პროდუქტებშია ხელმისაწვდომი (მაგალითად, სურათები, დიზაინები, ვიდეოები, ან ბგერები, რომლებსაც უზრუნველყოფთ და მათ ამატებთ თქვენ მიერ შექმნილ ან გაზიარებულ შიგთავსს Facebook-ზე), ჩვენ ვიტოვებთ ყველა უფლებას ამ შიგთავსზე (მაგრამ არა თქვენსაზე). შეგიძლიათ გამოიყენოთ მხოლოდ ჩვენი საავტორო უფლებები ან სასაქონლო ნიშნები (ან ნებისმიერი მსგავსი ნიშნები), რაც პირდაპირ არის ნებადართული ჩვენი ბრენდის გამოყენების სახელმძღვანელოთი ან ჩვენი წინასწარი წერილობითი ნებართვით. თქვენ ჩვენგან უნდა მიიღოთ წერილობითი ნებართვა (ან ლიცენზირების ნებართვა ღია წყაროს კოდით), რათა შეცვალოთ, თარგმნოთ, შექმნათ წარმოებული პროდუქტები, შეძლოთ მათი დეკომპილირება ან გადაკონსტრუირება, ან სხვაგვარად სცადოთ წყაროს კოდის ჩვენგან ამოღება, გარდა იმ შემთხვევისა თუ თქვენზე არ ვრცელდება გამონაკლისი ან შეზღუდვა მოქმედი კანონმდებლობით ან თქვენი მოქმედება არ ეხება Meta-ს Bug Bounty პროგრამას. ჩვენ ვიტოვებთ ყველა უფლებას, რომელიც არ მოგენიჭათ აშკარა ფორმით.

4. დამატებითი დებულებები

4.1 ჩვენი პირობების განახლება

ჩვენ მუდმივად ვმუშაობთ ჩვენი მომსახურებების გაუმჯობესებასა და ახალი ფუნქციების შექმნაზე, რათა ჩვენი პროდუქტები უკეთესი გახდეს თქვენთვის და ჩვენი საზოგადოებისთვის. ამის შედეგად, დროდადრო შეიძლება დაგვჭირდეს წინამდებარე პირობების განახლება, რათა ზუსტად ავსახოთ ჩვენი სერვისები და მუშაობის მეთოდები, უზრუნველვყოთ ჩვენს პროდუქტებსა და სერვისებზე უსაფრთხო და საიმედო წვდომა და/ან დავიცვათ მოქმედი კანონმდებლობა. ჩვენ მხოლოდ იმ შემთხვევაში შევიტანთ ცვლილებებს, თუ დებულებები იქნება არააქტუალური ან არასრული და თუ ცვლილებების შეტანა იქნება გონივრული და თქვენი ინტერესებიდან გამომდინარე, ან თუ ცვლილებები საჭირო იქნება უსაფრთხოებისა და დაცვის მიზნებისათვის ან მოქმედი კანონმდებლობის დასაცავად.

ჩვენ შეგატყობინებთ (მაგალითად, ელფოსტით ან ჩვენი პროდუქტების საშუალებით) ამ პირობებში ცვლილებების შეტანის შესახებ მინიმუმ 30 დღით ადრე და მოგცემთ შესაძლებლობას, გადახედოთ მათ ძალაში შესვლამდე, გარდა იმ შემთხვევებისა, როდესაც ეს ცვლილებები კანონით მოითხოვება. განახლებული პირობების ამოქმედების შემდეგ, ისინი თქვენთვის შესასრულებლად სავალდებულოა, თუ განაგრძობთ ჩვენი პროდუქტების გამოყენებასა და მათზე წვდომას.

ვიმედოვნებთ, რომ განაგრძობთ ჩვენი პროდუქტების გამოყენებას, თუმცა, თუ არ ეთანხმებით განახლებულ პირობებს ან გსურთ წინამდებარე შეთანხმებით განსაზღვრული კონტრაქტის შეწყვეტა, თქვენი ანგარიშის წაშლა ნებისმიერ დროს შეგიძლიათ. ასეთ შემთხვევაში, ვალდებული ხართ შეწყვიტოთ Facebook-ისა და Meta-ს სხვა პროდუქტების გამოყენება ან მათზე წვდომა.

4.2 ანგარიშის შეჩერება ან შეწყვეტა

გვსურს, რომ Facebook იყოს ადგილი, სადაც ადამიანები თავს კომფორტულად და უსაფრთხოდ იგრძნობენ იმისათვის, რომ გამოხატონ საკუთარი თავი და გააზიარონ თავიანთი აზრები და იდეები.

თუ დავადგენთ, ჩვენი შეხედულებისამებრ, რომ თქვენ ცხადად, სერიოზულად ან განმეორებით დაარღვიეთ ჩვენი პირობები ან დებულებები, მათ შორის, განსაკუთრებით ჩვენი საზოგადოების სტანდარტები, ჩვენ შეიძლება შევაჩეროთ ან სამუდამოდ გავაუქმოთ Meta-ს კომპანიის პროდუქტებზე თქვენი წვდომა ან სამუდამოდ გავაუქმოთ ან წავშალოთ თქვენი ანგარიში. ჩვენ ასევე შეგვიძლია გამოვრთოთ ან წავშალოთ თქვენი ანგარიში, თუ თქვენ განმეორებით არღვევთ სხვათა ინტელექტუალური საკუთრების უფლებებს, ან თუ ამის გაკეთებას გვავალდებულებს სამართლებრივი მიზეზები.

ჩვენ შეიძლება გამოვრთოთ ან წავშალოთ თქვენი ანგარიში, თუ რეგისტრაციის შემდეგ ანგარიში არ არის დადასტურებული, არ გამოიყენება და რჩება უმოქმედო დიდი ხნის განმავლობაში, ან თუ აღმოვაჩენთ, რომ ვიღაცამ შეიძლება გამოიყენა ის თქვენი ნებართვის გარეშე და ჩვენ ვერ დავადასტურებთ ანგარიშის ფლობაზე თქვენს უფლებას. შეიტყვეთ მეტი ანგარიშების გამორთვისა და წაშლის შესახებ.

თუ ჩვენ ასეთ ზომებს მივიღებთ, ჩვენ შეგატყობინებთ და აგიხსნით იმ ვარიანტებს, რომლებიც გაქვთ გადახედვის მოთხოვნასთან დაკავშირებით, გარდა იმ შემთხვევისა, თუ ამით ჩვენ ან სხვები აღმოჩნდებიან სამართლებრივი პასუხისმგებლობის წინაშე; ზიანი მიადგება ჩვენს მომხმარებელთა საზოგადოებას; ხელი შეეშლება ჩვენი რომელიმე სერვისის, სისტემის ან პროდუქტის მთლიანობას ან მუშაობას; სადაც ტექნიკური შეზღუდვების გამო ვართ შეზღუდულები; ან როდესაც ეს სამართლებრივი მიზეზების გამო გვეკრძალება.

შეგიძლიათ გაიგოთ მეტი იმის შესახებ, თუ რის გაკეთება შეგიძლიათ, თუ თქვენი ანგარიში გაუქმდა, ასევე, როგორ დაგვიკავშირდეთ, თუ ფიქრობთ, რომ ჩვენ შეცდომით გავაუქმეთ თქვენი ანგარიში.

იმ შემთხვევაში თუ წაშლით ან ჩვენ გავაუქმებთ ან წავშლით თქვენს ანგარიშს და შეწყვეტთ Facebook-ისა და Meta-ს სხვა პროდუქტებზე წვდომას, მათ გამოყენებას ან მათ მონახულებას, ან თუ წინამდებარე კონტრაქტი სხვაგვარად წყდება, ასეთ დროს შეწყდება წინამდებარე პირობები, როგორც ჩვენსა და თქვენ შორის არსებული შეთანხმება, გარდა ქვემოთ ჩამოთვლილი იმ დებულებებისა, რომლებიც ძალაში რჩება: (3, 4.2-4.5).

4.3 შეზღუდვები პასუხისმგებლობაზე

ჩვენ აქტიურად ვმუშაობთ იმისათვის, რათა უზრუნველვყოთ საუკეთესო პროდუქტების მიწოდება და მკაფიოდ განვსაზღვროთ სახელმძღვანელო მითითებები ყველასთვის, ვინც მათ იყენებს. თუმცა, ჩვენი პროდუქტები მოწოდებულია „როგორც არის“ და, კანონით დაშვებულ ფარგლებში, ჩვენ არ ვიძლევით გარანტიას, რომ ისინი ყოველთვის იქნება უსაფრთხო, დაცული, ან უშეცდომო, ან რომ ისინი იმუშავებს შეფერხებების, დაყოვნების და შეცდომების გარეშე. კანონით დაშვებულ ფარგლებში, ჩვენ ასევე არ ვიძლევით გარანტიას, იქნება ეს გამოხატული თუ ნაგულისხმევი, მათ შორის, საქონლის ვარგისიანობის ნაგულისხმევი გარანტიებს, კონკრეტულ მიზანთან შესაბამისობას, საკუთრების უფლებისა და ინტელექტუალური საკუთრების უფლებათა დაცულობის გარანტიებს. ჩვენ არ ვაკონტროლებთ და არ ვაძლევთ მიმართულებას იმას, რასაც ხალხი და სხვები აკეთებენ ან ამბობენ, და ჩვენ არ ვართ პასუხისმგებელნი მათ ქმედებებზე ან ქცევაზე (იქნება ეს ონლაინ თუ ოფლაინ) ან მათ მიერ გაზიარებულ ნებისმიერ შიგთავსზე (მათ შორის, შეურაცხმყოფელი, შეუსაბამო, უცენზურო, უკანონო და სხვა წინააღმდეგობის გამომწვევი შიგთავსი).

ჩვენ ვერ ვიტყვით წინასწარ, როდის შეიძლება წარმოიშვას პრობლემები ჩვენს პროდუქტებთან დაკავშირებით. შესაბამისად, ჩვენი პასუხისმგებლობა შემოიფარგლება მოქმედი კანონმდებლობით ნებადართული მოცულობით. მოქმედი კანონმდებლობით დაშვებულ მაქსიმალურ ფარგლებში, არცერთ გარემოებაში არ ვიქნებით პასუხისმგებელი თქვენ წინაშე ნებისმიერ მიუღებელ მოგებაზე, შემოსავალზე, ინფორმაციასა ან მონაცემებზე, ან შემთხვევით, არაპირდაპირ, განსაკუთრებულ, ირიბ, საჯარიმო, სადამსჯელო ან თანანმდევ ზიანზე, რომელიც გამომდინარეობს წინამდებარე პირობებიდან ან Meta-ს პროდუქტებიდან ან უკავშირდება მათ (მიუხედავად მათი გამოწვევის მიზეზებისა და პასუხისმგებლობის ნებისმიერი თეორიისა, დაუდევრობის ჩათვლით), მაშინაც კი, თუ ჩვენ გვეცნობა ამგვარი ზიანის დადგომის შესაძლებლობის შესახებ.

4.4 დავები

ჩვენ ვცდილობთ, მოგაწოდოთ გასაგები/აღქმადი წესები, რათა შევამციროთ ან, საუკეთესო შემთხვევაში, თავიდან ავიცილოთ დავა თქვენსა და ჩვენ შორის. თუმცა, თუ დავა მაინც წარმოიშობა, სასარგებლოა წინასწარ ვიცოდეთ, თუ სად შეიძლება მისი მოგვარება და რა კანონები იმოქმედებს.

თუ თქვენ მომხმარებელი ხართ, ან თუ ამას მოქმედი კანონმდებლობა მოითხოვს, იმ ქვეყნის კანონმდებლობა, სადაც თქვენ ცხოვრობთ, ვრცელდება ჩვენს წინააღმდეგ მიმართულ ნებისმიერ პრეტენზიაზე, სარჩელსა ან დავაზე, რომელიც წარმოიშობა ან ეხება ამ პირობებს ან Meta-ს პროდუქტებს და თქვენ შეგიძლიათ განიხილოთ თქვენი პრეტენზია ამ ქვეყნის ნებისმიერ კომპეტენტურ სასამართლოში, რომელიც ამ პრეტენზიაზე ავრცელებს თავის იურისდიქციას. ყველა სხვა შემთხვევაში, ასევე, ნებისმიერი პრეტენზიის, სარჩელის ან დავისთვის, რომელსაც Meta წარადგენს თქვენ წინააღმდეგ, თქვენ და Meta თანხმდებით, რომ ნებისმიერი ასეთი პრეტენზია, სარჩელი ან დავა უნდა გადაწყდეს ექსკლუზიურად აშშ-ში. კალიფორნიის ჩრდილოეთ ოლქის საოლქო სასამართლოში ან სან მატეოს ოლქში მდებარე შტატის სასამართლოში. თქვენ ასევე თანხმდებით, რომ დაემორჩილებით ამ სასამართლოებიდან ნებისმიერის პერსონალურ განსჯადობას ასეთი სარჩელის განხილვის მიზნით და რომ კალიფორნიის შტატის კანონები დაარეგულირებს წინამდებარე პირობებსა და ნებისმიერ სარჩელს, სარჩელის საფუძველს ან დავას, საკოლიზიო სამართლის ნორმების გათვალისწინების გარეშე. ზემოაღნიშნულის შეზღუდვის გარეშე, თქვენ ეთანხმებით იმას, რომ თავისი შეხედულებისამებრ, Meta-ს შეუძლია წარადგინოს ნებისმიერი პრეტენზია, სარჩელი, ან წამოიწყოს დავა, რომელიც გვაქვს თქვენთან კავშირში, იმ ქვეყნის ნებისმიერ კომპეტენტურ სასამართლოში, სადაც თქვენ ცხოვრობთ და რომელსაც აქვს იურისდიქცია ამ პრეტენზიასთან მიმართებით.

4.5 სხვა პირობები

დამატებითი მონაცემები: ზოგიერთ ჩვენ მიერ შემოთავაზებულ პროდუქტს, ასევე, არეგულირებს დამატებითი პირობები. თუ რომელიმე ამ პროდუქტს იყენებთ, დამატებითი პირობები ხელმისაწვდომი იქნება და გახდება ჩვენი შეთანხმების ნაწილი. მაგალითად, თუ ჩვენს პროდუქტებს კომერციული ან საქმიანი მიზნებით იყენებთ, როგორიცაა რეკლამების ყიდვა, პროდუქციის გაყიდვა, აპლიკაციების შემუშავება, ჯგუფის ან გვერდის მართვა თქვენი ბიზნესისთვის ან ჩვენი გაზომვითი სერვისების გამოყენება, თქვენ უნდა დაეთანხმოთ ჩვენს კომერციულ პირობებს. თუ თქვენ გამოაქვეყნებთ ან გააზიარებთ მუსიკის შემცველ შიგთავსს, უნდა დაეთანხმოთ ჩვენს მუსიკის სახელმძღვანელო მითითებებს. თუ ავატარებს იყენებთ, თქვენზე, ასევე, გავრცელდება ავატარის პირობები. თუ ჩვენს ხელოვნური ინტელექტის პროდუქტებსა და ფუნქციებს იყენებთ, თქვენზე, ასევე, გავრცელდება Meta-ს ხელოვნური ინტელექტის პირობები. თუ რაიმე დამატებითი პირობები ეწინააღმდეგება წინამდებარე პირობებს, კოლიზიის ფარგლებში უპირატესობა მიენიჭება დამატებით პირობებს.
იურიდიული ძალა: თუ დადგინდა, რომ წინამდებარე პირობების რომელიმე ნაწილმა დაკარგა იურიდიული ძალა, ძალადაკარგული ნაწილი ჩაითვლება შეცვლილად იმ მინიმალური მოცულობით, რაც საჭიროა მის აღსასრულებლად, ხოლო, თუ ეს ვერ მოხერხდა, მისი მოქმედება შეწყდება და დარჩენილი ნაწილი სრულად დარჩება ძალაში. თუ ვერ შევძლებთ ამ პირობათაგან რომელიმეს აღსრულებას, ეს არ ჩაითვლება ამ პირობების შესრულებაზე უარის თქმად. ამ პირობების ნებისმიერი შესწორება ან მათზე უარის თქმა უნდა გაფორმდეს წერილობით და ხელმოწერილი უნდა იყოს ჩვენ მიერ.
ტრანსფერის გამორიცხვა: ჩვენი თანხმობის გარეშე ვერ გადასცემთ წინამდებარე პირობებით გათვალისწინებულ თქვენს უფლებებსა თუ ვალდებულებებს ვერცერთ სხვა პირს.
ანგარიშის მემკვიდრე: შეგიძლიათ დანიშნოთ პირი (ე.წ. ანგარიშის მემკვიდრე) თქვენი ანგარიშის სამართავად, ხსოვნის სტატუსის დაყენების შემდეგ. თუ ჩართავთ ამას თქვენს პარამეტრებში, მხოლოდ თქვენი ანგარიშის მემკვიდრე ან ის პირი, რომელიც თქვენ დაასახელეთ ნამდვილ ანდერძსა ან მსგავს სამართლებრივ დოკუმენტში, რომელშიც გამოხატულია მკაფიო თანხმობა ამ პირისთვის თქვენი შიგთავსის გამჟღავნების შესახებ გარდაცვალების ან ქმედუუნარობის შემთხვევაში, შეძლებს თქვენი ანგარიშიდან ინფორმაციის შეზღუდულ გამჟღავნებას, მასზე ხსოვნის სტატუსის დაყენების შემთხვევაში.
მესამე პირი ბენეფიციარების პირობების გამორიცხვა: ეს პირობები რომელიმე მესამე პირს არ ანიჭებს რაიმე ბენეფიციარულ უფლებებს. წინამდებარე პირობებით გათვალისწინებული ყველა ჩვენი უფლება და ვალდებულება თავისუფლად გადაცემადია შერწყმასთან, შეძენასა, ან აქტივების გაყიდვებთან დაკავშირებით, კანონის ძალით ან სხვაგვარად.
მომხმარებლის სახელის ცვლილება: გარკვეულ გარემოებებში ჩვენ შეიძლება შევცვალოთ მომხმარებლის სახელი თქვენი ანგარიშისთვის (მაგალითად, თუ ვინმე აცხადებს პრეტენზიას მომხმარებლის სახელზე და ის არ უკავშირდება იმ სახელს, რომელსაც თქვენ იყენებთ ყოველდღიურ ცხოვრებაში).
გამოხმაურება: ჩვენ ყოველთვის ვაფასებთ თქვენს გამოხმაურებასა და სხვა შემოთავაზებებს ჩვენი პროდუქტებისა და მომსახურებების შესახებ. თუმცა, შეგვიძლია გამოვიყენოთ თქვენი გამოხმაურება და სხვა შემოთავაზებები, ყოველგვარი შეზღუდვის ან თქვენთვის კომპენსაციის გადახდის ვალდებულების გარეშე და, ასევე, ვალდებული არ ვართ, დავიცვათ მათი კონფიდენციალურობა.

5. სხვა პირობები და წესები, რომელიც თქვენზე ვრცელდება

საზოგადოების სტანდარტები: ამ სახელმძღვანელო პრინციპებში აღწერილია ჩვენი სტანდარტები იმ შიგთავსთან დაკავშირებით, რომელსაც თქვენ Facebook-ზე ავრცელებთ და თქვენს აქტივობას Facebook-ზე და Meta-ს სხვა პროდუქტებთან დაკავშირებით.
კომერციული პირობები: ეს პირობები ვრცელდება, თუ ჩვენს პროდუქტებს ასევე იყენებთ ნებისმიერი კომერციული ან საქმიანი მიზნით, მათ შორის რეკლამირება, აპლიკაციის გამოყენება ჩვენს პლატფორმაზე, ჩვენი გაზომვის სერვისების გამოყენება, ბიზნესისათვის ჯგუფის ან გვერდის მართვა, ან საქონლისა ან მომსახურების გაყიდვა.
საზოგადოების გადახდის პირობები: ეს პირობები ვრცელდება გადახდებზე, რომლებიც ხორციელდება Meta-ს პროდუქტებზე ან მათ მეშვეობით.
კომერციული დებულებები: ამ სახელმძღვანელო პრინციპებში მოცემულია დებულებები, რომელიც გამოიყენება, როდესაც თქვენ Facebook-ზე, Instagram-სა, და WhatsApp-ზე გასაყიდად სთავაზობთ პროდუქტებს ან მომსახურებებს.
მუსიკის სახელმძღვანელო მითითებები: ამ სახელმძღვანელო პრინციპებში მოცემულია დებულებები, რომელიც გამოიყენება ნებისმიერ Meta-ს პროდუქტებზე მუსიკის შემცველი შიგთავსის გამოქვეყნების ან გაზიარების შემთხვევაში.
სარეკლამო პოლიტიკა: წინამდებარე დებულებები ვრცელდება პარტნიორებზე, რომლებიც ახორციელებენ რეკლამას Meta-ს პროდუქტებში და განსაზღვრავს, თუ რა ტიპის რეკლამის შიგთავსია დაშვებული იმ პარტნიორების მიერ, რომლებიც რეკლამას ავრცელებენ Meta-ს პროდუქტების ფარგლებში.
რეკლამის დამოუკიდებელი მართვის პირობები: წინამდებარე პირობები მოქმედებს მაშინ, როდესაც იყენებთ თვითმომსახურების სარეკლამო ინტერფეისებს, რეკლამირების ან სხვა კომერციული ან დაფინანსებული აქტივობის ან შიგთავსის შესაქმნელად, წარსადგენად ან მისაწოდებლად.
Facebook-ის გვერდების, ჯგუფებისა და ღონისძიებების დებულება: წინამდებარე სახელმძღვანელო მითითებები ვრცელდება იმ შემთხვევაში, თუ თქვენ ქმნით ან ადმინისტრირებას უწევთ Facebook-ის გვერდს, ჯგუფს ან ღონისძიებას, ან თუ იყენებთ Facebook-ს კომუნიკაციისთვის ან რეკლამის ადმინისტრირებისთვის.
Meta-ს პლატფორმის დებულება: ეს პირობები ვრცელდება API-ების, SDK-ების, ხელსაწყოების, დანამატების, კოდის, ტექნოლოგიის, შიგთავსის და სერვისების ნაკრების გამოყენებაზე, რომელიც საშუალებას აძლევს სხვებს განავითარონ ფუნქციები, მიიღონ მონაცემები MetaProducts-დან ან მოგვაწოდონ მონაცემები.
დეველოპერთა გადახდის პირობები: ეს პირობები ვრცელდება პროგრამების დეველოპერებზე, რომლებიც იყენებენ Facebook-ის გადახდებს.
Meta ბრენდის რესურსები: ამ სახელმძღვანელო მითითებებში მოცემულია დებულებები, რომელიც გამოიყენება Meta-ს სასაქონლო ნიშნების, ლოგოებისა და ეკრანის ანაბეჭდების გამოყენებასთან დაკავშირებით.
რეკომენდაციების სახელმძღვანელო: Facebook-ის რეკომენდაციების სახელმძღვანელო და Instagram-ის რეკომენდაციების სახელმძღვანელო ასახავს ჩვენს სტანდარტებს რეკომენდებული და არარეკომენდებული შიგთავსის შესახებ.
ონლაინ-ტრანსლაციებთან დაკავშირებული დებულებები: ეს დებულებები ვრცელდება Facebook Live-ზე გადაცემულ ყველა შიგთავსზე.
ავატარის პირობები: წინამდებარე პირობები ვრცელდება ავატარებისა და ჩვენი ავატარის ფუნქციების გამოყენებაზე, მათ შორის ავატარის მაღაზიაში ავატარის ტანსაცმლის შესყიდვასა და შეძენაზე.
Meta AI-ს პირობები: წინამდებარე პირობები არეგულირებს ჩვენი გენერაციული ხელოვნური ინტელექტის პროდუქტებისა და ფუნქციების გამოყენებას.